قوم مسلم اور تلاوت قرآن سے غفلت

مبسملا و حامدا و مصلیا و مسلما

            یہ بڑی ہی خوش آئند بات ہے کہ آج دن بدن اہل سنت و جماعت کے طلبہ و علما میں تصنیف و تالیف کے ساتھ عربی زبان میں لکھی گئی معیاری کتابوں کا مادری زبان اردو میں ترجمہ کرنے کا شوق و ذوق کسی حد تک بڑھ رہا ہے، انہیں شائقین میں سے ہمارے عزیز حضرت مولانا محمد دانش ازہری زید علمہ ہیں، آپ نے فضائل قرآن پاک کے متعلق ایک اہم کتاب بنام: ‘‘الأربعین فی فضائل کلام ربّ العالمین؍تالیف: حضرت علاّمہ اشرف حامد حسانَین زید مجدہ’’ کا واضح اور بامحاورہ ترجمہ کیا ہے، جو ان شا اللہ  اردو داں حضرات کے لیے قرآن مجید کی اہمیت و افادیت پر روشنی ڈالنے کے ساتھ، ان کے لیے رہنما بھی ثابت ہوگی۔

            دور حاضر میں ایسے کاموں کی سخت ضرورت ہے، جن کے ذریعہ لوگ روزآنہ قرآن شریف کی تلاوت کریں، اس کو سمجھنے کی کوشش کریں اور اس کے بعد ان کی عملی زندگی قرآن مجید کی عکاسی کرتا ہوا نظر آئے؛ کیوں کہ آج اکثر لوگ مادیت پرستی کے دلدل میں پھنس کر، اس کی تلاوت سے غافل ہیں،گھنٹوں ہوٹل میں بیٹھ کر لایعنی باتوں میں وقت ضائع کردیں گے، دوسروں پر تبصرہ کرنے کے لیے بیٹھک کریں گے اور پوری زندگی مچھر کے پنکھ برابر بھی حیثیت نہ رکھنے والی دنیا کے کچھ حصہ کو حاصل کرنے میں صرف کردیں گے، لیکن قرآن پاک پڑھنے کی بات آجائے؛ تو ان کے پاس ٹائم نہیں،اس کے سمجھنے کا ان کے پاس وقت نہیں، پھر قرآن پاک کے مطابق عملی رنگ و ڈھنگ نظر آنا تو بہت دور کی بات ہے! یہ صحابہ سے محبت کا دعوی کرنے والوں کا حال ہے! مگر صحابہ کرام رضی اللہ عنہم کا قرآن مجید کے متعلق کیا موقف تھا، بطور مثال ایک صحابی کی فکر ملاحظہ فرمالیں:

            حضرت ابن مسعود رضی اللہ تعالیٰ عنہ فرماتے ہیں :

((اللہ رب العزت  کی قسم جس کے سو ا کوئی معبود نہیں ،قرآن کی جوبھی آیت نازل ہوئی،مجھے علم ہے کہ وہ کہاں اور کس سلسلے میں نازل ہوئی اور اگرمجھے پتہ چلتا کہ کوئی مجھ سے بڑھکر قرآن کا عالم ہے اور سواری وہاں پہونچ سکتی ہے؛ تو میں ضرور اس کےحضور حاضر ہوتا)) (صحیح البخاری)

مسلمانو! حلال دولت حاصل کرنے کے ساتھ قرآن پا ک کی تلاوت کرنے بھی کا التزام کرو؛ اس کی وجہ سے تمہیں ان شا اللہ مانگنے سے زیادہ دولت، ثروت اور مالداری ملے گی، حدیث پاک ملاحظہ فرمائیں:

حضرت ابوسعید خدری رضی اللہ تعالیٰ عنہ سے مروی ہے ،حضور ﷺنے فرمایا:

((اللہ رب العزت ارشاد فرماتاہے:جس کوقرآن اور میرے ذکر نے مجھ سے مانگنے سے مشغول رکھا،میں اسے مانگنے والوں سے بہتر عطا کروں گا،اور کلام الہی کی فضیلت تمام کلام پر ایسے ہی ہے جیسے اللہ جل جلالہ کی فضیلت تمام مخلوق پر ہے)) (سنن الترمذی)

مسلمانو! قرآن پاک پڑھو، اس کی تلاوت کو ترک کرکے اپنے گھروں کو قبرستان نہ بناؤ، یہی وہ کتاب ہے جو تمہیں ان شا اللہ زمینی و آسمانی بلاؤں سے نجات دلائے گی، حدیث پاک پیش خدمت ہے:

حضرت ابو ہریرہ رضی اللہ تعالیٰ عنہ سے روایت ہے، آپ کہتے ہیں: حضور ﷺ نے فرمایا:

((اپنے گھروں کو مقبرہ نہ بناؤ ، بلاشبہ شیطان اس گھر سے دور بھاگتا ہے جس میں سورۂ بقرہ کی تلاوت کی جاتی ہے)) (صحیح مسلم)

مسلمانو! اللہ تعالی اور اس کے رسول صلی اللہ علیہ و آلہ وسلم کی رضا کے لیے قرآن پڑھو، اسے یادکرو اور اس کے مطابق زندگی گزارو، ان شا اللہ آپ کا یہ طریقہ کار آپ کو جنت میں بہت بلند مقام عطا کرے گا، حدیث نبوی ملاحظہ فرمائیں:

حضرت عبداللہ بن عمرو بن عاص رضی اللہ عنہ سے روایت ہے کہ نبی کریم ﷺ نے فرمایا :

((قرآن پڑھنے کے ساتھ ساتھ عمل بھی کر نے والے  سے(قبر میں) کہا جائے گاکہ تلاوت کر اور بلندی حاصل کر،اور ترتیل سے پڑھ جیسا کہ دنیا میں پڑھاکرتاتھا؛اس لیے کہ تیری منزل (جنت میں ) وہ بلند جگہ ہے جہاں توآخری آیت پڑھ کر ختم کرے گا)) (سنن ابی داؤد(

            قرآن پاک کی تلاوت کرنا، اس کو سمجھنا اور اس کے مطابق عمل کرنا، دنیا و آخرت، ہر جگہ کامیابی و کامرانی کا باعث ہے، مگر افسوس کہ مسلمان اپنے رب تعالی کی اس عظیم تر نعمت سے غافل ہے!!مسلمانو! اپنی غفلت سے باز آؤ اور اپنے جائز امور کے ساتھ قرآن پاک پڑھنے کے لیے وقت نکالو، اس کو سمجھنے کی کوشش کرو اور اسی کے فرامین کے مطابق زندگی گزارو،  انشا اللہ دنیا سنور جاے گی اور آخرت کی زندگی جو اصل زندگی ہے، اس میں بھی تمہارے ہاتھوں میں کامیابی کا پرچم لہراےگا، اللہ تعالی ہمیں توفیق عطا فرمائے، آمین۔

            ایک فکر کو کسی دوسری زبان میں منتقل کرنا، یہ کتنا مشکل امر ہے، یہ ترجمہ کرنے والا اور اس کی مشکلات سے آگہی رکھنے والا ہی سمجھ سکتا ہے، پھر بھی محترم حضرت مولانا محمد دانش ازہری زید علمہ نے ان مشکلات کا سامنا کرکے ایک عربی کتاب کو اردو میں ترجمہ کیا اور اپنے اس پہلے مقصد میں کامیابی سے ہمکنار ہوئے، اللہ تعالی جسے چاہے اپنے فضل و کرم سے نوازے، اللہ تعالی ان کی اس اہم کوشش کو عام و خاص میں مقبولیت عطا کرے، ان کی اس کاوش کو قبول کرکے ان  کے لیے ذریعہ نجات بنائے، مزید تصنیف و تالیف اور ترجمہ جیسے پائدار کام خلوص کے ساتھ کرنے کی توفیق عطا فرمائے، اور دیگر طلبہ و علما کی توجہ  اس طرف زیادہ سے زیادہ مبذول فرمائے، آمین بجاہ سید المرسلین صلی اللہ علیہ و آلہ وسلم۔

طالب دعا:

ابو عاتکہ ازہار احمد امجدی مصباحی ازہری غفرلہ

فاضل جامعہ ازہر شریف، مصر، شعبہ حدیث، ایم اے

بانی فقیہ ملت فاؤنڈیشن، خادم مرکز تربیت افتا و خانقاہ امجدیہ، اوجھاگنج، بستی، یوپی، انڈیا۔

ای میل: fmfoundation92@gmail.com

موبائل: 831817713

13/ذو القعدۃ 1438ھ، مطابق 8/8/2017م

(تقدیم)